វិធីឆ្ពុងប្រើគ្រឿងផ្សំ៣មុខ ជួយឱ្យស្បែកមុខសស្អាត ម៉ដ្ឋរលោង និងបាត់មុន

ស្នាមមុនដែលនៅជាប់លើផ្ទៃមុខ និងស្បែកស្រអាប់គឺជាអ្វីដែលនារីស្អប់បំផុត រហូតត្រូវចំណាយប្រាក់ទិញថ្នាំ ឬឡេលាប។ បើអ្នកកំពុងស្វែងរកវិធីដ៏មានសុវត្ថិភាពក្នុងការបញ្ឈប់បញ្ហាលើស្បែកមុខទាំងនេះ អាចងាកមកសាកល្បងវិធីឆ្ពុងបែបធម្មជាតិដោយប្រើគ្រឿងផ្សំតែបីប៉ុណ្ណោះ គឺស្លឹកគ្រៃ ក្រូចឆ្មារ និងអំបិល ធានាថានឹងទទួលបានស្បែកមុខដ៏ស្រស់ថ្លា ម៉ត់រលោង និងបំបាត់មុនបានយ៉ាងមានប្រសិទ្ធភាព។

វិធីធ្វើ៖

យកស្លឹកគ្រៃ៦គល់មកពុះពាក់កណ្ដាល ចំណែកក្រូចឆ្មារហាន់ជាចំណិតស្ដើងៗ។
យកឆ្នាំងដាំទឹក២លីត្រឱ្យពុះ រួចដាក់ស្លឹកគ្រៃ និងក្រូចឆ្មារដែលហាន់រួចចូល បង់អំបិលមួយស្លាបព្រាបាយកូរឱ្យសព្វ។
ក្រោយទឹកស្លឹកគ្រៃពុះហើយ ចូរបន្ថយភ្លើងមកតិចៗវិញរយៈពេល៥ទៅ១០នាទី ដើម្បីរម្ងាស់ឱ្យចេញប្រេងធម្មជាតិពីស្លឹកគ្រៃ និងក្រូចឆ្មារ។

វិធីប្រើ៖

វិធីទី១

អាចយកទឹកនេះមកប្រើសម្រាប់លាងមុខជាមុនសិន ដើម្បីលាងសម្អាតជាតិពុល កោសិកាងាប់ៗដែលនៅជាប់ស្បែកមុខ និងដើម្បីបើករន្ធញើសឱ្យរីកធំ។

វិធីទី២

បន្ទាប់ពីលាងសម្អាតផ្ទៃមុខរួច យកទឹកដែលដាំខាងលើដាក់ឆ្នាំងដី ឬក្នុងឆ្នាំងក្ដៅដាក់លើតុ។
យកកន្សែងធំមកគ្របជុំវិញមុខ ដោយឱនមុខនៅរកឆ្នាំងទឹក (យកកន្សែងគ្របឱ្យជិត កុំឱ្យចំហាយទឹកចេញក្រៅបាន)។
ពេលកំពុងទទួលចំហាយឆ្ពុង ត្រូវឱនមុខត្រឹម២០ស.មពីឆ្នាំងទឹកបានហើយ កុំដាក់ជិត ឬឆ្ងាយជាងនេះ ហើយយកម្រាមដៃម៉ាស្សាថ្នមៗលើផ្ទៃមុខ ដោយរុញជារង្វង់ចុះឡើងៗ ដើម្បីឱ្យចំហាយឆ្ពុងជ្រាបចូលស្បែកមុខបានល្អ។